Pilegrimspass og Olavsbrev

Tradisjonen med pilegrimspass stammar frå mellomalderen. Passet vart opphavleg brukt for å dokumentere at ein var ein ekte pilegrim når ein kom som framand til ein ny stad.

Ordninga er vidareført i vår tid, men det er valfritt om ein vil skaffe pilegrimspass og samle stempel. Stempla ein samlar undervegs utgjer ei oversikt over stader ein har vitja, og fungerer som ei «minnebok» frå turen. Mange pilegrimar heng det opp på veggen når dei kjem heim.

Passet kan mellom anna stemplast på pilegrimsherberga, på regionale pilegrimssenter og i kyrkjer. Ved overnattingsstader som ikkje har stempel kan du be husverten om å få ei enkel påteikning i passet.

Du kan kjøpe pilegrimspasset her.

Har du vandra dei siste ti mila inn til Trondheim og Nidarosdomen kan du be om å få Olavsbrevet som stadfesting på at du har vandra Pilegrimsleden. Du viser fram pilegrimspasset med stempel og påteikningar som dokumentasjon. Olavsbrevet vert delt ut ved pilegrimsmottaket på Nidaros pilegrimsgård som ligg rett ved Nidarosdomen. 

Turforslag som kvalifiserer til Olavsbrevet

• Berkåk til Trondheim på Gudbrandsdalsleden.
• Stiklestad til Trondheim på St. Olavsleden 
  – velg mellom indre lei eller ytre lei.
• Tynset til Trondheim på Østerdalsleden.

Du kan òg få Olavsbrevet om du syklar dei siste 20 mila inn til Trondheim. Vi rår til å sykle frå Åre, Sverige til Trondheim på St. Olavsleden. 

Reiser du langs Kystpilegrimsleia, som i hovudsak er ei båtrute, må du samle minst seks stempel frå ulike nummererte nøkkelstader for å få Olavsbrevet. I tillegg må du ha eit siste stempel frå Nidarosdomen. Les mei om nøkkelstader og Kystpilegrimsleia her.

Vi både oppmodar og håpar at alle som har nådd pilegrimsmålet Nidarosdomen, òg tek turen innom pilegrimsmottaket på Nidaros pilegrimsgard. Her får du dei siste stempla og «pilegrimsbyens gullmynt» i pilegrimspasset. Den gjev deg gratis inngang til Nidarosdomen og mange andre fordelar i Pilegrimsbyen Trondheim. Du vert òg registrert i vår statistikk, og får Olavsbrevet dersom du oppfyller krava.

Pilegrimsmottaket er først og fremst bemanna av frivillige pilegrimsvertar som brenn for Pilegrimsleden. I tillegg til stempling, Olavsbrev og statistisk registrering, byr dei på kaffi, ein sjokoladebit og ein prat.

For grupper på over seks personar er det ønskjeleg at dei fyller ut grupperegistreringsskjemaet som ligg ved her, og sender det på epost til trondheim@pilegrimssenter.no i forkant av ankomst. Slik kan dei frivillige i pilegrimsmottaket førebu eventuelle Olavsbrev og statistikkarbeid, slik at vitjinga i mottaket vert enklare for både gruppa og vertskapet.

Det finst òg eit flott pilegrimsdiplom for pilegrimar som ikkje kvalifiserer til Olavsbrevet.

Du finn meir informasjon om pilegrimsmottaket her: Nidaros pilegrimsgård, pilgrimsmottaket